[82] ‘‘สปฺปจฺจยา , ภิกฺขเว, อุปฺปชฺชนฺติ ปาปกา อกุสลา ธมฺมา, โน อปฺปจฺจยาฯ ตสฺเสว ปจฺจยสฺส ปหานา เอวํ เต ปาปกา อกุสลา ธมฺมา น โหนฺตี’’ติฯ

[83] ‘‘สรูปา , ภิกฺขเว, อุปฺปชฺชนฺติ ปาปกา อกุสลา ธมฺมา, โน อรูปาฯ ตสฺเสว รูปสฺส ปหานา เอวํ เต ปาปกา อกุสลา ธมฺมา น โหนฺตี’’ติฯ

[84] ‘‘สเวทนา, ภิกฺขเว, อุปฺปชฺชนฺติ ปาปกา อกุสลา ธมฺมา, โน อเวทนาฯ ตสฺสาเยว เวทนาย ปหานา เอวํ เต ปาปกา อกุสลา ธมฺมา น โหนฺตี’’ติฯ

[85] ‘‘สสญฺญา, ภิกฺขเว, อุปฺปชฺชนฺติ ปาปกา อกุสลา ธมฺมา, โน อสญฺญาฯ ตสฺสาเยว สญฺญาย ปหานา เอวํ เต ปาปกา อกุสลา ธมฺมา น โหนฺตี’’ติฯ

[86] ‘‘สวิญฺญาณา , ภิกฺขเว, อุปฺปชฺชนฺติ ปาปกา อกุสลา ธมฺมา, โน อวิญฺญาณาฯ ตสฺเสว วิญฺญาณสฺส ปหานา เอวํ เต ปาปกา อกุสลา ธมฺมา น โหนฺตี’’ติฯ

[87] ‘‘สงฺขตารมฺมณา, ภิกฺขเว, อุปฺปชฺชนฺติ ปาปกา อกุสลา ธมฺมา, โน อสงฺขตารมฺมณาฯ ตสฺเสว สงฺขตสฺส ปหานา เอวํ เต ปาปกา อกุสลา ธมฺมา น โหนฺตี’’ติฯ

สนิมิตฺตวคฺโค ตติโยฯ

(9) 4. ธมฺมวคฺโค

[88] ‘‘ทฺเวเม , ภิกฺขเว, ธมฺมาฯ กตเม ทฺเว? เจโตวิมุตฺติ จ ปญฺญาวิมุตฺติ จฯ อิเม โข, ภิกฺขเว, ทฺเว ธมฺมา’’ติฯ

[89] ‘‘ทฺเวเม, ภิกฺขเว, ธมฺมาฯ กตเม ทฺเว? ปคฺคาโห จ อวิกฺเขโป จฯ อิเม โข, ภิกฺขเว, ทฺเว ธมฺมา’’ติฯ

[90] ‘‘ทฺเวเม , ภิกฺขเว, ธมฺมาฯ กตเม ทฺเว? นามญฺจ รูปญฺจฯ อิเม โข, ภิกฺขเว, ทฺเว ธมฺมา’’ติฯ

[91] ‘‘ทฺเวเม, ภิกฺขเว, ธมฺมาฯ กตเม ทฺเว? วิชฺชา จ วิมุตฺติ จฯ อิเม โข, ภิกฺขเว, ทฺเว ธมฺมา’’ติฯ

[92] ‘‘ทฺเวเม, ภิกฺขเว, ธมฺมาฯ กตเม ทฺเว? ภวทิฏฺฐิ จ วิภวทิฏฺฐิ จฯ อิเม โข, ภิกฺขเว, ทฺเว ธมฺมา’’ติฯ

[93] ‘‘ทฺเวเม, ภิกฺขเว, ธมฺมาฯ กตเม ทฺเว? อหิริกญฺจ อโนตฺตปฺปญฺจ ฯ อิเม โข, ภิกฺขเว, ทฺเว ธมฺมา’’ติฯ

[94] ‘‘ทฺเวเม, ภิกฺขเว, ธมฺมาฯ กตเม ทฺเว? หิรี จ โอตฺตปฺปญฺจฯ อิเม โข, ภิกฺขเว, ทฺเว ธมฺมา’’ติฯ

[95] ‘‘ทฺเวเม, ภิกฺขเว, ธมฺมาฯ กตเม ทฺเว? โทวจสฺสตา จ ปาปมิตฺตตา จฯ อิเม โข, ภิกฺขเว, ทฺเว ธมฺมา’’ติฯ

[96] ‘‘ทฺเวเม, ภิกฺขเว, ธมฺมาฯ กตเม ทฺเว? โสวจสฺสตา จ กลฺยาณมิตฺตตา จฯ อิเม โข, ภิกฺขเว, ทฺเว ธมฺมา’’ติฯ

[97] ‘‘ทฺเวเม , ภิกฺขเว, ธมฺมาฯ กตเม ทฺเว? ธาตุกุสลตา จ มนสิการกุสลตา จฯ อิเม โข, ภิกฺขเว, ทฺเว ธมฺมา’’ติฯ

[98] ‘‘ทฺเวเม , ภิกฺขเว, ธมฺมาฯ กตเม ทฺเว? อาปตฺติกุสลตา จ อาปตฺติวุฏฺฐานกุสลตา จฯ อิเม โข, ภิกฺขเว, ทฺเว ธมฺมา’’ติฯ

ธมฺมวคฺโค จตุตฺโถฯ

(10) 5. พาลวคฺโค

[99] ‘‘ทฺเวเม , ภิกฺขเว, พาลาฯ กตเม ทฺเว? โย จ อนาคตํ ภารํ วหติ, โย จ อาคตํ ภารํ น วหติฯ อิเม โข, ภิกฺขเว, ทฺเว พาลา’’ติฯ